Глава 4

[Глава] 4

О РОЗСТРИГЕ ГРИГОРИИ И О СМЕРТИ ЦАРЯ БОРИСА

В лeто 7113 (1605 г.) нeкто чернец, Григорий именем, от рода Отрепьевых сей юн еще навыче чернокнижию и прочим злым, тойже, отшед от Росии, вселься в предeлeх королевства Польскаго; и тамо живя и составляше ложнаа писаниа и посылаа повсюду, проповeдаа жива царевича Димитриа себе нарицаа. Сам же от мeста на мeсто преходя и крыяшеся и мятяше в двою государьству всeми людьми. За се же яшяся крeпцe вси они вышепомянутые бeгуны, Сeверских и Польских градов жителие, вeчныя холопи Московскиа, им же дойде время по их вражию изволению. И прежде убо мало-по-малу прилагахуся весь от веси, та же и град от града, дондеже и вси погибошя. Но того лукавство всeм вeдомо бысть. И какова злаа содeяшяся? И до днесь вся Росиа не может от выя своея разрeшити того ярма; и яже во всей Росии сотворенных от него злых со всeми любительми его злодeйства, немощно никому во многаа времена исписати. Четвертую бо часть всея вселенныя, всю Европию, в два лeта посланьми своими прельсти; и папа же Римский всему западу о нем восписа: изгнана того суща от отечества являше. И Польскому кралю третиему Жикгимонту вси на месть за него повелeшя строитися. Приложи бо ся к вeчным врагом христианским, к Латыньским учеником, и обeщася неложно им з записанием, еже вся Росиа привести к стрыеви1 антихристову под благословение и непричащающихся мерзости запустeниа опрeсночному хлeбу всeх предати смерти. И аще не бы Господь сверг того велехвальную гордыню, то и мог бы сиа содeлати. На него же и много приличествует пророчество Иезекииля боговидца в 21-й главe; и по той же главe назнаменует и смерть тому, яко же речено «и будеши огню ядь, и кровь твоя среди земля твоея пролиется»2.

Царь же Борис, аще и не от него убиен бысть, но во время неправдою замышленого состава Григориева скорою смертию посeчен бысть в лeто 7113 (1605 г.); и вси, на них же надeяшеся, з домом его разсeяни бышя.

Той же чернец по его смерти того же лeта на царство его восходит, нарицаяся Димитрий; от многих же знаем, яко Григорий чернец, хотя же укрeпитися на Росии царем. И собирает весь род убиеннаго царевича Димитриа и инeх многих, царем Борисом разсeянных; и еще и не привед тeх прещеньми, послeди же и дарьми всeх прельсти. Прельсти же ся и мати царевича Димитриа, инока Марфа, бывшаа жена царя Ивана Васильевича всея Русии, и нарицает того врага, сына своего суща. Тогда же не токмо род его Галичане вси обличаху, но и мати его, Богданова жена Отрепьева вдова Варвара и з сыном своим, с его Григорьевым братом, и з дядею Смирным Отрепьевым тако же обличаху. И дядя его в Сибирь сослан, много приим озлоблениа. Мученицы же новии явльшеся тогда: дворянин Петр Тургенев да Федор Колачник без боязни того обличаху. Им же по многих муках главы отсeкошя среди царьствующаго града Москвы. Той же Федор, ведом к посeчению, вопиаше всему народу: Се приали есте образ антихристов и поклонитеся посланному от сатаны; и тогда разумeете, егда вси от него погибнете. Москвичи же ругахуся ему и по дeлом суд тому быти глаголюще. Тако же и Петрову казнь ни во что же вмeнишя. И вскорe по них князь Василей Ивановичь Шуйской за его же обличение на плаху осудися, его же усрамившеся Поляки, у розстриги едва испросивше от посeчениа.

Потом же совeтом его злым с патриархом Игнатием3 покоршеся вси митрополиты, архиепископы и епископы, архимариты, и игумены, и весь первоначальствующих священный чин, и князи и боляре со всeми начальствующими воем, и приложиша руки и послы, избравше, послашя в королевство Польское просяще у пана Сердамирсково дочери тому розстриге в жену. И истинно свидeтельствующе о нем в тeх писаниих, яко праведно сын царя Ивана Васильевича Димитрий, а вси знающе, яко Григорий чернец, наипаче же Пафнотий, митрополит Крутицкий: при нем в Чюдовe монастырe на крылосe стоял и у патриарха Иова болe года во дворe был, служа писмом. И за свое еретическое воровство от него збeжа в Литву. И яко же колесница фараоновы неволею связашяся, такожде и все Росийское государьство в безумие вдашяся, и возлюбишя вси лесть. Совершенное же лукавство той окаанный розстрига сам усовeтова с Сердамирским, егда бысть в Польше, еще в дому его питаася; по его же злому умыслу ятся пути4, взем дщерь свою Маринку, и привед с собою на брак беззаконный пиршествеников 6000 избранного воинства. И взяты бышя вси домы великиа на панов не токмо у простых, но и у властей и у вельмож и у нарицаемых ложных родителей его у Нагих. И во всeх крeпких мeстех и в домeх еретическое насилование вселися.

Кривовeрию же рачитель розстрига того же бояся, еже и над Борисовым родом содeяся, и в хождении и исхождении дома царьскаго и по граду всегда со многим воиньством eздяше. Спреди же и созади его во бронях текуще с протазаны5 и алебарды6 и со инeми многими оружии, един же он токмо посредe сих; вельможи же и боляре далече от него бяху. И бe страшно видeти множество оружии блещащихся. Нeмец же и Литву хранители и стражи постави себe и всeм крeпостем царьского дома. Зерньщиком7 же толико попусти играти и воровати, яко и в самeх царьских полатах пред ним бeсящеся; невeдомо же каковыя ради радости, не токмо, иже по повелeнию его, весь синьклит, но и простии вси, яко женихи, и от конца до конца улиц в златe и в сребрe в багрeх странских8 ходяще веселяхуся. Пред лицем же его камением драгим и бисером многоцeнным украсившеся служаху. И не хотяше никого же видeти смиренноходящих. Поляком же вся сокровищя древняя истощи; и еретическое же сeмя Лютори воду черплюще ношаху сребряными сосуды и в банях мыющеся от златых и сребряных сосудов.

От злых же врагов казаков и холопей вси умнии токмо плачюще, слова же рещи не смeюще; аще бо на кого нанесут, яко розстригою нарицает кто, и той человeк невeдомо погибаше. И во всeх градeх Росийских и в честных монастырeх и мирстии и иночествующеи мнози погибошя: ови заточением, овeим же рыбиа утроба вeчный гроб бысть. Попусти же всeм Жидом и еретиком невозбранно ходити во святыя Божиа церкви; но и в самом в соборном храмe Пресвятыя Владычица нашея Богородица, честнаго и славнаго Ея Успениа приходящеи, возлегаху локотма и возслоняхуся на чюдотворныя гробы цeлбоносных мощей великих чюдотворец Петра и Ионы. И со оружии скверными Поляки за ним ходяще в церковь; но о сем никто же рещи не смeюще: смерть бо всeм предлежаше.

И вскорe же тогда проклятый папа Римский с листом присла, воспоминаа его обeты, еже о опрeсночном приношении и о суботнeм постe. Окаанный же розстрига тщашеся вскоре повеленное ему совершити. И абие браку присягнув, с еретицею вeнчан бысть в дому Божии. Много же он окаанный прежде спряжениа браку насильством дeвственных душ оскверни, женского полу и мужеского и инокинь доброобразных. Тако же и Поляки многа такова скверна студа содeяшя. Врази же, возведшеи его казаки, таковаа творима видяще, веселяхуся о погибели христианстей. И плачющим в бeдах и всeм скорбящим прeщаху9. И Жиды нарицаху их, глаголюще: «яко царю годно, и он тако и творит; вы же, Жиды, вскую о том сeтуете». Видяще же Москвичи погибель свою и на покаание к Богу не обращахуся, но радующеся в торзeх многим прибытком и воздыхающе вси, но сребро любезно вси собирающе.

Гордя же ся в безумии розстрига, повелe в титлах писати себе наяснeйшим, непобeдимым цесарем нарицашеся; мняше бо окаанный мало, еже царско имя носити, но вышшую и честнeйшую честь желаше привлещи. Сему же зазрeв10, нeкто от чина вельможьска, диак Тимофeй Осипов нарицаем, муж благочестив образом и нравом; той же добродeтельный муж видeв многа зла, творима разстригою с совeтники его. К сим же еще и несвойственное и великое имя на себе привлече; человeк тлeнен и всегда страстьми побeждаем внeшними и внутренними, а непобeдимым цесарем нарицашеся, и яко Богу противна являя себе. Ревность по Бозe приим Тимофей, и в дому своем к Богу пост и молитву прилeжну со слезами принесе. И причастився честных и животворящих Тайн Пречистаго Тeла и Крове Христа Бога нашего и, пришед в полаты царевы, с дерзновением пред всeми розстригу обличив: «яко ты», – рече, – «во истину Гришка Отрепьев розстрига, а не непобeдимый цесарь еси, ни царев сын Димитрий, но грeху раб и еретик». Розстрига же, не стерпeв обличениа и осрамотився, в той час смерти предаст его; и скончав течение подвига своего доблий мученик. Сиа же оставим до здe11. Посылает же розстрига х Крымскому царю з дары безчестны, здeлав шубу от кожь свиных и в писаниих являя себе приготовльшася со всею полунощною страною и грядуща к расхищению Крымских жилищ. И повелe Росии всей и от Поляков многим готовитися ити на Азов и на прочаа жилища Татарскаа. И немедлено послав на Елец много избранного наряду пушечново; по Дону же плавною и по суху Польскими проходы повелe рати ити. Доиде же слух и до Констянтинополя о сем. И готови Турцы бышя к пролитию крови христианскиа. О сем нeцыи глаголют, – истинно или ни, не вeм, – яко сице сотвори розстрига Крымскому царю, хотя его воздвигнути на брань, да изгубит христиан на велицeх полях, и не радуяся о побeдe на Агарян, но ища, како бы предати тeм всeх православных христиан, Москву же наполнити Поляки. Господь же гордых смысл разори и совeт его в дeло не произыде.



Оглавление

Богослужения

28 марта 2024 г. (15 марта ст. ст.)

Частые вопросы

Интересные факты

Для святой воды и масел

Стекло, несмотря на свою хрупкость, один из наиболее долговечных материалов. Археологи знают об этом как никто другой — ведь в процессе полевых работ им доводится доставать из земли немало стеклянных находок, которые, невзирая на свой почтенный возраст, полностью сохранили функциональность.