Троицкие листки, № 548. Праздник Рождества Господа Бога и Спаса нашего Иисуса Христа в Церковных песнопениях

Листок третий

Хвалебные славословия Рождеству Христову

Приидите, земнороднии, со Ангелы и мы составим лик: слава в вышних Богу — возопиим.

Бог человеком явися подобен и обнищавает плотию, да нас обогатит, и в вертепе раждается: Сего, вернии, чистым сердцем приимем. Премудрость и разум прежде веков сый, Сын единосущный Отцу и Духу, восхоте в последняя времена родитися от Девы нас ради, да спасет мир от мучительства вражия и чуждаго. Слава Рожденному плотию! Слава Благоизволившему! Слава Избавившему нас рождеством Своим!

Иже в вышних соседяй Отцу и Духу, Сын Божий безначальный начало приемлет и хощет плотию родитися яко человек.

Иже прежде век из Отца рождся паче мысли, из Девы напоследок воплотися как весть Сам.

Недр не отступль безначальна Родителя, в недрех чистыя Отроковицы водворяется, и сый безматерен прежде, ныне без отца воплощается, иже присно царствуяй Христос; Сего неисчетен (непостижим) и страшен род и неизреченен.

Устрашися всяк слух неизреченна Божия снисхождения, яко Вышний волею сниде даже и до плоти, от девическаго чрева быв человек.

Како изреку великое таинство? Бесплотный воплощается, Слово одебелевает (становится осязаемо). Невидимый видится,

Неосязаемый осязается, и Безначальный начинается, — Сын Божий сын человечь бывает. Иисус Христос вчера и днесь, Тойже и во веки. Невместимый везде— како вместися во чреве? Сый в недрех Отчих — како на руках Матерних? Всяко, яко весть, яко восхоте и яко благоволи.

Отец благоизволи, Слово плоть бысть, Дева роди Бога вочеловечшася, звезда возвещает, волсви покланяются, пастырие чудятся, и тварь радуется.

Неизменный Образ Отечь, Образ присносущия Его, зрак (вид) раба приемлет, от неискусобрачныя Матере прошед, не претерпев преложения (не изменился): еже бо бе (кем был) пребысть, и еже не бе — прият; Бог сый истинен, человек быв человеколюбия ради, Тому возопиим: рождейся от Девы, Боже, помилуй нас!

Глубину премудрости и разума Зиждителева кто испытает от человек? Божиих судеб бездну кто премудр постигнет? Ихже ради небеса преклонив, с человеки Плотоносец поживе.

Небо и земля днесь совокупишася, рождшуся Христу: днесь Бог на землю прииде, и человек на небеса взыде; днесь Невидимый естеством видим есть плотию, человека ради. Сего ради и мы славословяще возопиим Ему: слава в вышних Богу, и на земли мир: дарова бо пришествие Твое, Спасе наш, слава Тебе!

Небо и земля днесь пророчески да возвеселятся; Ангели и человецы духовно да торжествуют, яко Бог, рождейся от Девы, во плоти явися сущим во тьме и сени седящим. Вертеп и ясли прияша Того; пастырие чудо проповедуют; волсви от Восток в Вифлеем дары приносят; мы же хвалу недостойными устнами ангельски Тому принесем: слава в вышних Богу, и на земли мир: прииде бо Чаяние языков (Ожидаемый всеми народами), пришед спасе нас от работы вражия.

Неодержимую держащая и превыспреннюю на воздусе воду, бездны обуздавающая и моря востязующая (сдерживающая) Божия Премудрость, яко дождь на руно нисшедши, вселися во утробу Девы.

Велие и преславное чудо совершися днесь: Дева раждает и утроба не истлевает; Слово воплощается, и Отца не разлучается; Ангели с пастырьми славят, и мы с ними вопием: слава в вышних Богу, и на земли мир!

Чудо настоящее, чудо превосходящее, и слова и ума всего вышше: ибо Дева таяжде и Мати познавается, и Рождшееся купно Бог человек.

Чуда преестественнаго образ изобрази росодательная пещь, не бо палит юныя, яже прият, яко ниже огнь Божества — Девы, в Нюже вниде утробу.

Бесплотный воплощается, и Безлетный в лето бывает, и пеленами повивается нас ради Господь, Иже землю повиваяй мглою, плоть Сам паче постижения, неизменно явився от Неискусомужныя.

Таинство странное вижу и преславное: небо — вертеп, престол Херувимский — Деву, ясли — вместилище, в нихже возлеже Невместимый — Христос Бог, Егоже воспевающе величаем.

Странна (отчужденна) мя бывша от Бога преступленьми, Пребожественный, рождейся от Отроковицы неикусобрачныя, милости ради, гражданина небеснаго являет.

Безначальна Родителя Сын, Бог и Господь, воплощься от Девы, нам явися, омраченная просветите, собрата расточенная.

Славословия Господу Иисусу Христу

На престоле огнезрачнем в вышних седяй со Отцем безначальным и Божественным Твоим Духом, благоволил еси родитися плотию от Девы неискусомужныя, Иисусе, сего ради и звезда Тя от Персиды волхвом показа. Слава всеблагому Твоему совету! Слава явлению Твоему! Слава к человеком крайнему сошествию Твоему!

Христе Боже, воплотивыйся от Духа Святаго и от Приснодевы Марии вочеловечивыйся! Царство Твое царство всех веков, и владычество Твое во всяком роде и роде. Свет нам возсия, Христе Боже, Твое пришествие; Свет от Света, Отчее Сияние, всю тварь просветил еси; всякое дыхание хвалит Тя; Образ славы Отчия, Сый и прежде Сый, возсиявый от Девы, Боже, помилуй нас!

Видел еси нашу болезнь и озлобление, щедрый Христе, и не презрел еси нас, но истощил еси Тебе Самаго, не отступив Родителя, и вселился еси в утробу неискусобрачную, яже неболезненно родити Тя плотию в вертепе предгрядет.

Твоего на земли явления, Христе Боже, проповедая пророк пришествие, с веселием вопияше: слава силе Твоей, Господи!

Божественное Твое разумев истощание, прозорливо Аввакум, Христе, со трепетом вопияше Тебе: во спасение людей Твоих, спасти помазанныя Твоя пришел еси!

Да Твой взыщеши образ, погребенный страстьми, Спасе, небесных утаився сил, воплощся из Девы, явился еси.

Написался еси Кесаревым повелением, хотя написати в книзе жизни, Всецарю, человека, странно во Своя пришел еси, на небо призывая.

Страшно и преславно и велие таинство: Невместимый во чреве вместися и Мати по рождестве паки пребысть Дева, Бога бо роди, из Нея воплощенна. Тому возопиим, Тому песнь рцем, со Ангелы воспевающе: свят еси, Христе Боже наш, Иже нас ради вочеловечивыйся, слава Тебе!

Господи, в Вифлеем пришед, в вертеп вселился еси; небо престол имея, во яслех восклонился еси; Егоже воинства окружают Ангел, пастырем снисшел еси, да спасеши, яко благоутробен, род наш: слава Тебе!

В бессловесных яслех Тя полагает Дева, Божие Слово безначальное, начало приемшее паче ума: мое бо разрешите бессловесие грядеши, еже подъях завистию змииною, — пеленами же повитися грядеши, яко да расторгнеши рубы и пленицы прегрешений моих.

Зрящи Тя в Вифлееме плотию раждаема, Создателя и Зиждителя всех, тварь вся новотворится паки и обновляется, солнце же свет простре, и земля радуется. О чудесе! Питатель питается Материю всечистою, ради мирскаго спасения и обновления.

Горе Тя на престоле, и доле в яслех, премирная и земная разумевше, Спасе мой, дивляхуся державе Твоей, явилбося еси паче ума сугуб естеством — Богочеловек.

Что тебе принесем, Христе, яко явился еси на земли, яко Человек, нас ради? Каяждо бо от Тебе бывших тварей благодарение Тебе приносит: Ангели —пение, небеса — звезду, волсви — дары, пастырие — чудо (проповедь о чуде), земля — вертеп, пустыня — ясли, мы же — Матерь Деву. Иже прежде век, Боже, помилуй нас!

Величаем Тя, Живодавче Христе, и чтем пречистую Матерь Твою, из Нея же нас ради плотию родился еси.

Источник: Троицкие листки. Духовно-нравственное чтение для народа. ОАО «Молодая гвардия».