Слово, иже во Святых Отца нашего Иоанна Златоустаго вкратцe собранное и яснeе преложенное, о вочеловeчении Господни

СЛОВО,

ИЖЕ ВО СВЯТЫХ ОТЦА НАШЕГО ИОАННА ЗЛАТОУСТАГО
ВКРАТЦE СОБРАННОЕ И ЯСНEЕ ПРЕЛОЖЕННОЕ,
О ВОЧЕЛОВEЧЕНИИ ГОСПОДНИ

Воистинну явися нам Христова благодать, и просия нам благочестия сила. Воистинну возсия нам солнце правды; и свидeтельствуют то просвeщенные концы земные. Явися бо небесный Владыка, и землю, яко же восхотe, сотвори небом. Ибо сам быв небесный, творит нас небесными; и небесным небесная дарует. От вeрнаго, вeрным, вeрная. От святаго, святым, святая. От живаго, живым, живая.

Велия благочестия тайна, Апостол восклицает, Бог явися во плоти (1 Тим. гл. 3, ст. 16). Егда слышиши, яко Христово воплощение есть тайна, не испытывай, но молчи. Тайна Божия мыслям человeческим не подлежит. Аще же хощеши испытывати, и познати что о Христe, не вопрошай мысли своей, не совeтуйся с мудрецами: но вопроси Пророка, вопроси Апостола, испытай Ангела, и аще и сии не удовлетворят тя, помолися небесному Отцу.

Аще вопросиши Пророков, кто есть Христос? и отвeщает тебe Пророческий лик, глаголя: сей Бог наш, и не вмeнится ин к нему: изобрeте всяк путь художества, и даде Иакову отроку своему, Израилю возлюбленному своему: по сих на земли явися и с человeки поживе. Аще ли вопросиши, како Христос родился? Заградят твое дерзновение Пророки, и рекут: яже не вмeсти наш помысл: ты ли можеши вмeстити? Аще хощеши познати, познай, яко он Бог есть. Аще ли любопытствуеши о том, как он родился; на сие токмо услышишь от нас: род же его кто исповeсть? (Дeян. гл. 8, ст. 33).

Аще вопросиши и Апостолов, кто есть Христос, и отвeщает тебe весь лик Апостольский: яко Христос в началe бe слово, и слово бe у Бога и Бог бe слово (Иоан. гл. 1, ст. 1). И еще приложат тебe: яко он есть сияние славы, и образ Бога невидимаго, носяй всяческая глаголом силы своея (Евр. гл. 1, ст. 3). Но аще вопросиши их, како он, уже быв, родился? Рекут они тебe: что мы от Бога слышали, и чему научилися, то и возвeщаем: а каковым образом от сущаго родился сущий; сие мы содержим, вeруя глаголу Божию; а не постижением. Паки аще их вопросиши: ежели не вeдаете, како он родился; почему вeдаете, яко он Сын Божий есть? На сие они рекут тебe: слово плоть бысть, и вселися в ны, и видeхом славу Его, славу, яко единороднаго от Отца, исполнь благодати и истины (Иоан. гл. 1, ст. 14).

Аще ли, оставив уже Апостолов и Пророков, притечеши ко Ангелом, и речеши им: кто есть Христос проповeдуемый? Рекут тебe сии благовeствовавшие Пастырем: мы научилися токмо прославлять; а не испытовати. Слава в вышних Богу, и на земли мир, в человeцeх благоволение (Лук. гл. 2, ст. 14). Мы таковым образом его проповeдуем, и благовeствуем вам радость велию, яже будет всeм людем, яко родися вам Спас, иже есть Христос Господь, во градe Давидовe (Лук. гл. 2, ст. 10, 11). Аще ли речеши им: рцыте нам, что есть естество его, или како он есть со Отцем нераздeльная сила? На сие они рекут тебe: не слышал ли ты Пророка глаголющаго: хвалите Господа с небес: хвалите Его в вышних, хвалите Его вси Ангели Его: хвалите Его вся силы Его: слуги Его, творящии волю Его (Псал. 109, ст. 3). Нам волю Его творить повелeно; а не естество Его испытовать.

     Но и сам Отец небесный открывает нам, яко роди сына: из чрева прежде денницы родих тя (Псал. 148, ст. 1, 2): и сей есть Сын мой возлюбленный (Матф. гл. 3, ст. 17). Но каковым образом родил Его, сего нам не открывает: не для того, аки бы не вeдал Отец образ рождения своего, но яко мы того постигнути не можем. Нам токмо вeровати подобает глаголу Божию; а не на своих мыслях утверждатися. Сего ради Павел о еретиках глаголет: по своим прихотям изберут себe Учителей (2Тим. гл. 4, ст. 3).

Но приступим уже к тому, како Христос обновляет мир, како человeка, в раю грeхом обветшавшаго, поновляет своим домостроительством.

Сотвори Бог небо и землю: а на конец содeлал доброту человeческую. Якоже бо все тeло без лица безобразно есть: тако и все создание видимое без человeческаго совершенства, яко мертво есть. Каким же образом, послушай. Свeтло солнце: но само объяснить о себe не может. Свeтла луна: но сама свои обороты нам не истолковывает. Свeтел чин звeзд: но какия в нем течения и свойства, не они, но язык человeческий открывает. Нeт ничего в мирe, что бы не имeло нужды в словe человeческом, которое бы все то истолковало и открыло. Ибо добро, тогда наипаче есть добро, егда оно открывается: а без слова человeческаго все то есть, яко сокровенно.

Внемли убо: сотвори Бог небо и землю, а наконец человeка создал по образу своему и по подобию. Образ же ему даровал не сей зрак тeлесный; но сан властительства, разсудительную силу, и чтоб добродeтелями уподоблятися Творцу своему. И так по образу Божию и по подобию создан человeк: но человeк сие подобие произвел далeе границ и выше мeры, ему поставленной; простер его в безмeрие. Ибо хотя Бог сотворил человeка по образу своему и по подобию: однако его воля была, дабы он тщился уподоблятися благости Господней, мeрою, послeдованием и порядком. И сие мы вам примeром объясним. Аще кто от нас Господин имeет раба, и видит, что раб подобится ему в цeломудрии: любит его Господин и почитает. И аще узрит Господин раба, яко он в дeлe упражняется, в церковь ходит, благочестив, постен, милостыню творит: любит Господин раба, егда он ему таковыми дeлами подражает. Но егда раб подражание сие прострет выше мeры, и начнет подражати Господину во власти его, повелeвать рабам, яко Господин, расточать имeние господское, яко Господин: таковое подражение уже нeсть похвально, но порочно. Подобает бо рабу подражати Господина своего кротости, цeломудрию, благочестию, правдe, а не самовластию его.

Приняв убо человeк, дабы подражати благости Господней, простер свое подражание зeло далeе мeры, и пожелал быти ревнитель Божий, не по добродeтели, но по самовластию. Тако бо прельстил его змий, глаголя: воньже день снeсте, будете яко боги, вeдуще добро и зло (Быт. гл. 3, ст. 5). Похваляет Бог подражание, егда оно в своей мeрe: аще ли мeру прейдет, порочно бывает подражание. Уподобилися Богу Апостоли, и не были за то опорочены. Уподобилися Богу Пророки, и не были за то похулены: а паче похвалены, яко подражали – Божию человeколюбию, милости, правдe, святости. Но един нeкто уподобился Богу властию Божескою, и абие за то наказан бысть. Глаголет бо Исаиа к нeкоему тиранну в Вавилонe возгордившемуся равнобожием: ты бо рекл еси во умe твоем: на небо взыду и сяду на горах высоких к сeверу, сверху облак взыду, и выше звeзд поставлю престол мой, и буду подобен Вышнему: нынe же во ад снидеши, и во основания земли (Исаии гл. 14, ст. 13). Зриши ли, како вознесшагося гордостию казнит Господь! яко оставил уподоблятися Богу добродeтелию: а восхитил Божию власть. Всякое смертное естество, егда желает противу воли Божией, не токмо приемлет что, но и еже имать; и то погубляет.

     Таковым образом поползнулся человeк, и от поползновения многия язвы послeдовали: идолослужения, блуды, прелюбодeйства, лихоимства и сим подобная. Паде человeк падением велиим, и образ Божественнаго зрака погубил есть. Тварь раздeлилася: едина отступила, а другая престала повиноватися. Львы востали противу образа в человeкe сиявшаго; змии уязвлять начали. Все безсловесное естество на своего Господина вознеистовствовало, понеже увидeло, яко Господин их преступил закон Божий. Восхотeла было и другая тварь избeгнути подвластия. Не восхотeло было солнце осиявать преступника: луна помрачила было лучи своя. Восхотeли было звeзды не осиявать здание. Восхотeли было источники отрещись своих вод, рeки от течения, цвeтники от цвeтов, сады от плодов: все восхотeло было отрещися человeка, понеже отвергся он своего Владыки.

Вeдаю, яко сие слово есть глубоко и прикровенно; но подобает испытовати Божественнаго писания разум; из онаго познáем истину разсуждения нашего. Работала тварь человeку не для того, аки бы он того достоин был, но повелeл то Бог для почтения своего образа, коим благоволил Он украсити человeка. Но и по преступлении, хотя вся тварь возмущалася, Бог повелeвает и солнцу подавать свою лучу, и землù своя плоды и звeздам свои свeтлости: а почто? И что я не от себе, но из Слова Божия сие утверждаю, послушайте со вниманием Апостола о сем глаголюща: чаяние твари, откровения сынов Божиих чает. Суетe бо тварь повинуся неволею, но за повинувшаго ю на уповании, яко и сама тварь свободится от работы истлeния в свободу славы чад Божиих (Рим. гл. 8, ст. 19, 20, 21). Сих же слов Апостольских сила есть такова. Видeл Бог человeка, яко пал и яко тварь не хощет ему повиноватися и служити, Он понудил ю к тому и не хотящую, и повелeл солнцу возсиявати, и землù приносити плоды, а не отметатися преступника за преступление, обнадежив тварь своим обeщанием, яко она со истлeнным человeком во свое время имeет обновитися. Аки бы тако глаголал Бог твари: «понеже пал образ, и поползнулся преступлением, и растлeвается преслушанием, потерпи тварь, потерпи работати тлeнию растлeвшагося человeка. Се, егда обновлю мой образ, моею рукою сотворенный, человeка поврежденнаго, тогда с ним и тебе, тварь, обновлю, и участну его славы сотворю: отторглася ты его падением: но и востанеши с ним в его славe».

Что же есть, братие, во Апостольском словe, яко тварь убeгает человeческой власти, не хотя суетe работати? Ибо Апостол глаголет: суетe тварь повинуся. Каковой суетe? Егда совратися человeк от Бога, суетою сие нарицается. Обаче всяческая суета всяк человeк живый (Псал. 38, ст. 6). Всяк человeк, оставляющий Бога, есть суета, и за суетою всегда гонится. И сею человeческою суетою вся тварь в суету претворилася. Тварь учинилася не такова, какову сотвори ю Бог из начала. Вниде бо преступник, и оскверни землю, и оскверни небо, и оскверни воздух, море, и источники и рeки вся. Осквернил небо хулами, воздух сквернословиями, землю убийствами, море разбойниками, источники и рeки безлeпотными идолослужениями. Источники бо и рeки, и животныя, и древа, и вся тварь обоготворялися. Понеже ничто столь не оскверняет тварь, яко егда она боготворяется. И тако вся тварь была в смущении и в разстройствe, приходит наконец Спаситель мира, и проповeдуется Апостолами, яко прииде обновитель: но и Пророки проповeдовали, яко грядет обновити вся Христос.

Многие глаголют: не вeдал ли Бог, яко согрeшит Адам? Аз на сие глаголю, яко не токмо вeдал его преступление, но вeдал и то, яко воздвигнет его Христос своим промышлением. Не прежде Бог познал его падение, как вкупe и предумыслил, каковым образом возставити его. Прежде, нежели создан Адам; прежде, нежели от него явилось беззаконие, прежде, нежели родилися от него Праведнии и Пророцы, провидeл Бог, яко не можно образу его инако возстати, развe аще обновится от Христа. Во Адамe видeл Бог Павла, видeл и Петра: и вся в первом человeкe видeл: в корени бо сокрывалися плоды. И мнится мнe, яко Бог прежде вeк тако бесeдова сыну своему единородному: «Сотворим человeка по образу нашему и по подобию». Но аще согрeшит человeк, (а конечно согрeшит), тогда похулится наше создание: но се и зрим мы, (ибо будущее, яко настоящее вeдаем); яко согрeшает Адам, преступает, умирает, и тeм вси человeцы погибают: и оклевещут наше создание, аки бы оно злое сотворено было. Потребно прежде всего уставити врачевание. Подобает убо, о единородный Мой! о Сыне и Слове! о сияние Моея славы! облещися Тебe в сего тлeемаго человeка: подобает Ти Апостолов прияти. Да яко же диавол змия служителя употребляет оружием к прелести: тако Ты служителей сих приими для своего создания ко благодeянию, и обновиши падшаго. Исполни сие Божественное домостроительство.

Тако совeтовал Бог со единородным Сыном Своим, прежде еще, нежели Адам создан был, прежде, нежели воплотился Христос, прежде, нежели родилися Апостолы. И по утверждении уже таковаго совeта Адам создан. Откуду сие извeстно? Гдe обрeтается? Да не покажется вам, яко мы от себе глаголем в церкви. Аще аз от себе глаголю, всуе глаголю. Аще ли Божия проповeдую, и словà Духа Святаго сказую, приими учение. Гдe убо на сие свидeтельство обрeтается? Се явe Апостол глаголет к Тимофею: Спостражди Евангелию, по силe Бога спасшаго нас, не по дeлом нашим, но по своему благоволению, и благодати даннeй нам о Христe Иисусe, прежде лeт вeчных: избра прежде сложения мира; предустави и дарова нам прежде вeк (2 Тим. гл. 1, ст. 8). Сие свидeтельствует, яко прежде сотворения человeческаго предложися и уставися Спасителево домостроительство.

     Вeдал убо Бог, яко Адам в раю согрeшит, но вeдал же, яко и Спаситель воплотится, путь откроет добродeтели, и всeх в послушание привлечет. Видeл Бог ребро от Адама приемлемое, и в жену прелагаемое: но предвидeл и ребро Христово прободаемое, и производящее нам тайные дары, воду и кровь: из них же есть образ крещения: а другое причащения залог: и не толико оказывал язву, колико открывал лeчение. Тамо жена от мужа в законопреступление. Здeсь муж от жены во спасение. Тамо ребро, раждающее причину смерти: здeсь ребро приносящее обручение нетлeния. Тамо змия при древe: здeсь Христос при крестe. Тамо снeдь призывающая смерть: а здeсь снeдь смерть потребляющая. Извeстны тебe вeра, разум и тайна. Тамо прозрeли нещастливо, и увидeли, яко наги суть. Мы нынe прозрeли благочестиво, и зрим, яко одeяны есмы. Тамо обнажение у стад. Здeсь одeяние и просвeщение. Тамо кожаныя ризы, студ покрывающия. Здeсь риза славы, покрывающая нашу немощь: Христово тeло самаго Царя и Господа, есть одежда царская. Елицы бо во Христа крестистеся, во Христа облекостеся (Гал. гл. 3, ст. 27). Тамо земля еси, и в землю пойдеши. Здeсь обновив землю, творит человeка небесным, не землю обeщая, но небесное царство. Тамо пламенное оружие Адаму возбраняющее. Здeсь языки огненные с небесе Апостолов просвeщающие. Тамо изгнание из рая: здeсь поручаются ключи царствия небеснаго. Тако провидeл Бог будущая! еще не извлек воды: но уже водонос устрояет. Еще не потекли воды: а сосуды уготовляются.

     И егда вся уготовашася, грядет свыше, прежде вeк уставленный, вступает на небо; по реченному: Господи! приклони небеса, и сниди (Псал. 143, ст. 5). Прошел небеса, и освeтил их. Прошел воздух, да очистит его мирскими похотьми оскверненный. Ступает на землю, да освятит ю, убивствами посрамленну. Наступает на морския волны, да оскверненныя обмыет воды. Крещается во Иорданe, да и естество рeк обновит. Обрeтает Адама лежаща во гробe; и облачается во образ его, и творится Христос, обновление Адамово. Обновляется падший образ, возставляется и спасается.

За все сие прославим явльшагося, поклонимся пришедшему. Воспоем обновившаго, и оживотворившаго, и воздвигшаго, и оправдавшаго, и просвeтившаго, и всeх благ обилие нам даровавшаго, Иисуса Христа, Ему же слава, честь и держава и поклонение со Отцем и Святым Духом нынe и присно и во вeки вeков. Аминь.

Выбрано из Маргарита, из Слова о вочеловeчении Господни, лист 381 на оборотe.

       Говорено в Троицкой Лаврe, в трапезенной церквe, на утрени 1792 года Декабря 25 дня.